Свіное сала – любімы многімі прадукт. Засаліць яго дома зусім не складана – не патрэбны  ні асаблівыя прадукты, ні спецыяльныя ўмовы. Расказваем, як выбраць і засаліць сала смачна і хутка.

Выбіраем добрае сала

Для засолкі трэба выкарыстоўваць свежы прадукт. Якаснае сала мае скурку светла–карычневага колеру без пашкоджанняў, яно чыстае і прыемна пахне. Нож павінен уваходзіць у сала досыць мякка, з лёгкім супраціўленнем.

Колер сала белы, без жаўцізны — гэта будзе добра відаць на свежым разрэзе.

Спецыі для засолкі падыходзяць любыя: чорны перац гарошкам, востры перац, папрыка, гваздзіка, каляндра, чабор і іншыя, але абавязкова свежыя. Так, чорны перац гарошкам варта здрабніць непасрэдна перад выкарыстаннем.

Захоўванне сала

Соль выкарыстоўваем толькі буйнага памолу. Яе шкадаваць не варта – сала возьме столькі, колькі трэба. А вось недасолены прадукт прайграе ў гусце, і тэрмін яго захоўвання будзе меншы.

Свежае сала доўга не захоўваецца. У любым выпадку трымаць яго трэба ў халадзільніку,  або адразу прыгатаваць ці замарозіць.

Неабходна памятаць, што сала выдатна ўбірае староннія пахі, таму не трэба выкарыстоўваць ёмістасці ці пакеты пасля іншых прадуктаў, якія маюць ярка выяўленыя пахі.

Гатовы прадукт у халадзільніку лепш захоўваць, абгарнуўшы марляй, льняной тканінай ці пергаментнай паперай.

Захоўвайце ў цёмным месцы без траплення прамых сонечных прамянёў — у склепе, халадзільніку, маразільнай камеры.

Для замарозкі сала можна парэзаць на невялікія кавалкі і абгарнуць у харчовую плёнку. Паўторна замарожваць не рэкамендуецца, бо яго густ стане адчувальна горш.

Засолка сала ў слоіку

Інгрэдыенты (на трохлітровы слоік)

Сала – 2,5 кг.

Соль – 350 – 400 гр.

Часнок – 200 гр.

Перац чорны (молаты) – 2 ч.л.

Чабор – 1 ч.л.

Слоік памыць і высушыць, знутры нацерці сценкі часнаком.

Сала парэзаць на невялікія кавалкі (5 на 5 см).

Соль, чабор і молаты перац змяшаць у асобнай місачцы.

На дно слоіка насыпаць саляную сумесь, затым выкласці пласт сала і зноў сумесь – пакуль слоік не напоўніцца. Укладваць сала трэба дастаткова шчыльна.

Закрыць слоік крышкай і пакінуць на суткі пры пакаёвай тэмпературы. Затым прыбраць у халадзільнік мінімум на 2 дні, а лепей на тыдзень.

У такім выглядзе прадукт можа захоўвацца ў халаднаватым месцы без траплення сонечных прамянёў дастаткова доўга.

Для засолкі трэба выкарыстоўваць свежы прадукт.

Сала ў цыбульнай шалупіне

Інгрэдыенты:

Сала з праслойкай – 1 кг.

Соль – 200 гр.

Цыбульная шалупіна – 2 жмені

Цукар – 2 ст.л.

Лаўровы ліст – 3 шт.

Часнок – 3 зубчыкі.

Чорны перац – 3-5 гарошын.

Папрыка – па гусце.

Вада – 1 л.

Цыбульную шалупіну прамыць. Выкласці ў каструлю, дадаць соль, цукар і лаўровы ліст, заліць літрам вады. Давесці да кіпення. Калі шалупіны мала, можна крыху паварыць. Сала разрэзаць на  кавалкі і выкласці ў расол. Зверху накрыць талеркай — сала павінна быць цалкам пакрыта вадой.

Зноў давесці да кіпення і варыць на невялікім агні 20 хвілін.

Зняць з пліты і пакінуць астываць, затым паставіць у халаднаватае месца на 12 гадзін. Дастаць сала з расола і пачакаць, пакуль сцячэ вадкасць (або абсушыць ручніком). Прадукт павінен набыць характэрны аранжава-бэжавы колер.

Часнок дробна парэзаць або нацерці на дробнай цёрцы. Дадаць папрыку і молаты перац, змяшаць. Акуратна змазаць сала прыправамі, загарнуць у тоўстую паперу і пакінуць на некалькі гадзін пры пакаёвай тэмпературы. Затым прыбраць у халадзільнік.

Калі плануецца паспытаць сала ў той жа дзень, яго можна пакласці ў маразілку на некалькі гадзін. Перад падачай за 5 хвілін дастаць сала і наразаць на тонкія пласціны.

Сала з часнаком без расола

Вялікае значэнне мае прыправа – у дадзеным выпадку кмін, які можна замяніць чымсьці іншым на свой густ.

Інгрэдыенты:

Сала – 1 кг.

Соль буйная – 200 гр.

Часнок – 1 галоўка.

Чорны перац гарошкам – 6 шт.

Кмін – 1 ст.л.

Перац і кмін размалоць у ступцы або здрабніць іншым зручным спосабам. Часнок пачысціць і нарэзаць тонкімі пласцінкамі або нацерці на дробнай цёрцы. Змяшаць з соллю і прыправамі.

Сала нарэзаць аднолькавымі кавалачкамі. Чым больш кавалкі, тым даўжэй засольваецца сала.

Кожны кавалачак нацерці часночнай сумессю. Выкласці сала ў ёмістасць, накрыць зверху талеркай і прыціснуць прэсам. Пакінуць на некалькі гадзін пры пакаёвай тэмпературы, а затым прыбраць у халадзільнік на 2-3 дні. Прэс на гэты час можна прыбраць.

Незадоўга да падачы пры жаданні можна адправіць сала ў маразілку — у падмарожаным выглядзе яно будзе наразацца прыгожымі тонкімі кавалачкамі.

Сала з часнаком у расоле

Гатуем смачнае і духмянае сала ўсяго за тры дні.

Інгрэдыенты:

Сала – 1 кг.

Соль буйная – 6 ст.л.

Часнок – 1 галоўка.

Лаўровы ліст – 6 шт.

Чорны перац – 6 гарошын.

Вада (для расола) – 1 л.

Замачыць сала ў халоднай вадзе на некалькі гадзін. За гэты час зрабіць расол. У ваду для расола дадаць лаўровы ліст, соль, чорны перац. Давесці да кіпення і пакінуць астываць — расол для марынавання павінен быць цёплы.

Часнок пачысціць і нарэзаць пласцінкамі. Сала нарэзаць палоскамі шырынёй каля 4 сантыметраў і выкласці ў патрэбную ёмістасць. Кавалачкі пракласці часнаком. Заліць сала расолам і прыціснуць зверху чым-небудзь цяжкім. Пакінуць пры пакаёвай тэмпературы на суткі, пасля чаго прыбраць у халадзільнік яшчэ на 2 дні.

Пасля гэтага дастаць сала з расола і абсушыць папяровым ручніком. Прыбраць у маразілку на некалькі гадзін — за гэты час сала злёгку замерзне і будзе лёгка наразацца на тонкія пласціны.

Сала з зелянінай

Інгрэдыенты:

Соль – 300 гр

Часнок – 5-7 зубчыкаў

Зеляніна (кінза, кроп, пятрушка)

Спецыі (лаўровы ліст, гваздзіка, чорны перац) – па гусце

Гэты від засолкі зручна рабіць у каструлі. Сала нарэзаць невялікімі кавалачкамі.

Зеляніну дробна парэзаць, спецыі растаўчы ў ступцы або здрабніць іншым зручным спосабам. Выкласці ў асобную місачку і змяшаць з соллю.

Часнок пачысціць і нарэзаць лустачкамі. У сале зрабіць надрэзы і ўставіць туды кавалачкі часнаку і сумясь зеляніны. Частка часнаку павінна застацца. Звонку нацерці сала салянай сумессю. На дно каструлькі насыпаць некалькі лыжак солі. Выкласці сала, злёгку пасыпаць соллю і перакласці часнаком. Зверху зноў выкласці сала і паўтарыць працэс. Зачыніць крышкай і прыбраць у халадзільнік на 6-7 дзён.