Пасля кароткіх, сцюдзёных зімовых дзён так прыемна выйсці на вуліцу. Нават нам, гарадскім жыхарам, хочацца хвалу сонцу прапець. Нядзіўна, што ў нашых продкаў існаваў цэлы цыкл вясновых святаў «Гуканне вясны», у якіх захаваліся адгалоскі старажытнага культу сонейка.

З нецярпеннем чакалі нашы продкі 22 сакавіка — Саракі. У гэты дзень надавалася вялікае значэнне прылёту птушак. Верылі, што прылятае сорак выраяў, якія на сваіх крылах прыносяць сапраўдную вясну. Для іх ушанавання выпякалі «жаваранкаў» – невялікія булачкі ў выглядзе птушачак.
Колькі год запар у ДУДА «Чэрыкаўскі цэнтр дзіцячага і юнацкага турызму, краязнаўства і экскурсій» ладзіцца свята «Жавараначкі, прыляціце, вясну-красну прынясіце!». У гэтым го-дзе свята прайшло з удзелам навучэнцаў аб’яднання па інтарэсах «Тэатр фальклору», кіраўнік Галіна Каралёва.
Галіна Віктараўна пазнаёміла з традыцыямі сустрэчы вясны не толькі на Магілёўшчыне, але і на чэрыкаўскай зямлі. Расказала аб свяце Саракі, гісторыі яго паходжання, народных традыцыях і абрадах, звязаных з яго святкаваннем. Нагадала прыкметы і гаданні, якія праводзілі нашы бабулі і дзядулі ў гэты дзень.
Працягам свята сталі гульні, святочны карагод, якімі ўдзельнікі віталі і ўшаноўвалі вясну і сонца. Потым усіх удзельнікаў свята запрасілі на майстар-клас, які правяла кіраўнік гуртка «Кулінарная дыпламатыя» Валянціна Галанава. Майстар ДПЛ № 11 г. Чэрыкава вучыла навучэнцаў замешваць цеста, падзя-лілася сакрэтамі працы з ім. Пасля чаго хлопцы і дзяўчаты рабілі ўласнымі рукамі «жавараначкаў» з цеста. Як аказалася, гэта справа мае свае чароўныя сакрэты. Галоўнае, каб у жавараначкаў крылы былі распасцертыя, быццам яны ляцяць насустрач вясне. Таксама неабходна зрабіць дзюбу і вочкі, каб птушкі, калі заўважылі вясну, моцна шчабяталі.
Калі «жавараначкі» былі гатовы, навучэнцы адправіліся ў гарадскі парк, дзе ўпрыгожвалі дрэвы лентачкамі, птушкамі і разам гукалі вясну. Таксама рассыпалі зерне для птушак і дружна крычалі народныя вершы-зазывалкі. І, вядома, усіх каго сустрэлі, частавалі булачкамі-птушкамі, якія былі зроблены сваімі рукамі і таму неслі часцінку цеплыні.

Такія мерапрыемствы вельмі падабаюцца навучэнцам і не даюць забываць пра традыцыі нашага краю. Што вельмі актуальна пры рэалізацыі абласнога грамадзянскага праекта «#Мая_Зямля_Прыдняпроўе».

Алеся Каназобка, педагог-арганізатар ДУДА «Чэрыкаўскі цэнтр дзіцячага і юнацкага турызму, краязнаўства і экскурсій».